Hátíðin eina.

ÞJÓÐHÁTÍÐ!!!
Já nú er bara eitt framundan. Ég er semsagt kominn í frí þannig að eftir smástund legg ég í'ann suður á bóginn. Það er því aldeilis óvíst hvenær ég læt heyra í mér næst (verður þó örugglega ekki langt í það). Bless í bili, ég er farinn.

Hlutirnir gerðir með "stæl".

Þessir menn vita hvernig á að gera hlutina almennilega eða sleppa þeim ella. Það mætti kannski taka bílana þeirra og selja upp í sektina. Er þó hræddur um að það dygði skammt.

Skuldar 58 milljónir í stöðumælasektir

Vilja ekki tala!

Enda gæti það verið erfitt að lendi í því að þurfa að ræða við einhvern með rökum. Síðan hvenær er það ekki að koma sjónarmiðum sínum á framfæri að tala við viðkomandi? Þessir einstaklingar vilja bara skemma fyrir þeim sem eru að vinna vinnuna sína. Það að tala skilar greinilega ekki nægri athygli, en gæti hinsvegar skilað árangri.

Höfum ekki þörf fyrir að ræða við Friðrik

Afleiðing hækkandi verðs á flugfargjöldum?

Þetta er kannski málið, að skella hluta af fjölskyldunni í farangurinn.

Reyndu að innrita dverg í ferðatösku

Morðhundar (úlfar).

Hvar voru dýraverndarsinnar núna? Hvernig er hægt að láta svona grimmdarlegt dráp óátalið? Það er með öllu óásættanlegt að hrefnugreyið skuli hafa verið látið kveljast.

Hrefna barðist fyrir lífi sínu við hóp háhyrninga

Lágmarksklæðnaður á Esjunni.

Er kannski búið að setja reglur um réttan klæðaburð til Esjugöngu, hvað teljist lágmarksbúnaður?
Hitt er svo annað mál að kannski er skynseminni ekki fyrir að fara þegar menn fara naktir í slíka göngu í þokunni.

Þegar ég ritaði þetta í gær datt mér í hug einhver furðufugl eða "húmoristi". Það hefur síðan komið á daginn að þetta er mun alvarlegra en svo. Það er ekkert grín þegar að björgunarsveitir eru ræstar út til leitar, það þekki ég vel sjálfur. Vonandi finnst maðurinn og fær viðeigandi aðstoð.

Allsnakinn á Esjunni í 600 metra hæð

Hvurslags vitleysa er þetta?

Verði einum bannað að mæta en öðrum ekki, eiga íþróttamenn og konur að taka sig saman og sniðganga leikana. Mér finnst ekki rétt að gera slíkt í pólitískum tilgangi en þegar að kínversk stjórnvöld ætla sér að fara að velja hverjir teljist hæfir til að taka þátt ættu aðrir þátttakendur að sýna sóma sinn í að mótamæla slíku rugli.

Geðfatlaðir óvelkomnir á Ólympíuleikana

Þéttskipuð dagskrá júlímánaðar.

Það er víst óhætt að segja að þessi mánuður hefur ekki boðið upp á mikla afslöppun, ekki það að ég sé að kvarta.
Fyrsta helgi mánaðarins bauð upp á Goslokahátíð. Virkilega skemmtileg helgi, Skvísusundið troðfullt af fólki þannig að ég gat ekki snúið mér í hálfhring án þess að hitta einhvern sem maður "þurfti" að stoppa og spjalla við.
Helgina þar á eftir komu pabbi og maður frænku minnar í heimsókn. Sú helgi var að vísu vinnuhelgi hjá mér þannig að ég gat ekki sinnt þeim sem skyldi. Samt náði ég að fara með þeim á Reyðarfjörð og Eskifjörð á fimmtudeginum. Þeir fóru síðan niður á Borgarfjörð eystri á föstudeginum og þegar ég var búinn að vinna seinnipartinn á laugardeginum kíktum við inn að Skriðuklaustri.
Nýliðna helgi var ég á ættarmóti á Borgarfirði eystri. Hjalli bro og Þórína syss komu á fimmtudagskvöldið austur og við fórum síðan á föstudeginum niður eftir. Frábær helgi í alla staði. Þau fóru síðan upp úr hádeginu suður en ég skrapp ásamt nokkrum frændum mínum í Loðmundarfjörð. Þangað var ég að koma í fyrsta skipti og ég sé svo sannarlega ekki eftir að hafa farið í þá ferð.
Um næstu helgi verða síðan Bræðslutónleikarnir á Borgarfirði þannig að ég á fastlega von á því að kíkja aftur niður eftir þá helgina.
Síðan er komið að Þjóðhátíðinni. Ég legg í'ann héðan seinnipartinn á þriðjudaginn og stoppa eitthvað frameftir vikunni eftir hátíðina.
Ég fer í sumarfrí á þriðjudeginum þannig að það er eiginlega óráðið hvað ég geri af mér fram til 18. ágúst þegar ég byrja aftur að vinna, það kemur bara í ljós.
Semsagt viðburðarríkur mánuður sem er langt frá því að vera búinn.

Stóri bróðir?

"búið er að skrá þá sem einstaklinga sem geti síðar meira valdið vandræðum."
Bíðið nú við! Núna er farið að segja til um það hverjir verða til vandræða. Af hverju ekki bara stinga þeim strax inn og koma þannig í veg fyrir vandann? Mér finnst þetta svolítið varhugavert. Hvers eiga þeir að gjalda sem ertu komnir á slíkan lista?

Aðgerðir fyrir vandræðafjölskyldur

Brottför á næsta leiti.

Nú styttist í að við ferðalangarnir leggjum af stað austur á bóginn. Helgin er búin að vera frábær. Bærinn, reyndar Eyjan öll, er búinn að vera iðandi af lífi. Heimamenn, brottfluttir og gestir eru búnir að njóta hinna ýmsu dagskrárliða sem í boði hafa verið.
Í gærkvöldi var síðan grillveisla hjá pabba og mömmu í tilefni afmælis pabba (á reyndar afmæli á morgun). Frábær matur og góð stemmning. Að sjálfsögðu var síðan farið í Skvísusundið. Þar var þvílík mannmergð að það tók langan tíma að komast eitthvað áfram í gegn um þvöguna. Að vísu var það aðallega vegna þess að ég gat varla snúið mér við án þess að rekast á vini og kunningja þannig að alltaf var verið að stoppa til að spjalla og hlægja. Þarna rakst ég m.a. á Kidda, strák sem var að vinna með mér í Eyjaberg fyrir ca. 25 árum síðan. Hvorugur okkar mundi nafn hins en það var fljótt að rifjast upp. Ég kom heim rétt fyrir kl. fimm í morgun sæll og ánægður eftir frábært kvöld.
En núna er semsagt kominn tími til að ferðbúast.