Þetta er nú meiri helv... heppnin!

Hvað er eiginlega að fólki? Mér finnst þessi ummæli dæma sig sjálf. Vesalings mótmælandinn á samúð mína alla líkt og Geir. Að telja einhvern heppinn að hafa fengið krabbamein ber vott um algera heimsku. Ég vona að viðkomandi verði aldrei svo "heppinn" að fá krabba heldur lifi góðu lífi, laus við sjúkdóma hverskonar.

„Ekki farin að finna til með honum ennþá“

Hvað er að marka?

Þór Jóhannesson sem mbl fréttir ræddu við sagði að um 100 svartklæddir sérsveitarmenn hafi ruðst í gegn um hóp mótmælenda og m.a. handleggsbrotið mann. Er eitthvað að marka svona yfirlýsingu? Ég efast um það að það séu rúmlega 100 sérsveitarmenn á vaktinni.
En hvað veit ég svo sem.
En það sem ég sá í dag og í kvöld voru því miður að miklu leiti skrílslæti. Ég sé ekki hvað það þjónar tilgangi í mótmælum sem þessum að rífa niður jólatréð sem stóð fyrir framan alþingishúsið og brenna það á báli.

Beittu kylfum á mótmælendur

Þetta er sko mesta bull sem ég hef nokkurn tíman heyrt.

Ég rakst á athyglisvert blogg áðan sem að leiddi mig að einhverju því mesta bulli sem ég hef séð nýlega. Hversu veruleikafirrt er þetta lið eiginlega orðið? Með því að kalla fiska "sjávarkettlinga" á að fá fólk til að hætta að borða fiska. Enda er hlekkur á síðunni hjá þeim þar sem þeir bjóða "free copy of PETA’s vegetarian starter kit", þ.e. byrjunarpakka fyrir grænmetisætur. Það skiptir þetta lið engu máli þó svo að lífsafkoma einstaklinga og jafnvel heilla þjóða sé í húfi. Nei, þessir morðóðu fiskimenn geta bara farið að rækta soja og aðrar vörur sem eru þessu hyski þóknanlegar. Fyrir mitt leiti segi ég; FLEIRI SJÁVARKETTLINGA Á MINN DISK.

Risastór smáfrétt.

Ég sá þessa frétt á síðu 2 í Fréttablaðinu í dag og leitaði því að henni á mbl.is.
Í báðum tilfellum fór frekar lítið fyrir henni. Að mínu mati er þetta þó langt frá því að vera einhver smáfrétt enda löngu orðið tímabært að Björn láti af embætti.
Ég vona bara að þessi frétt eigi við einhver rök að styðjast.

Fullyrt að Björn hætti eftir landsfund

2008 í stuttu máli.

Árinu 2008 lauk á sama hátt og sama stað og það hófst, í góðu yfirlæti hjá Jóhönnu og Tedda á Faxastígnum. Þar var ég ásamt foreldrum mínum, Hjalla og Þórínu. Eftir að hafa verið hér í góðu yfirlæti yfir áramótin fór ég aftur austur þar sem vinnan og hversdagsleikinn biðu mín. Ég fékk pabba í fljótlega heimsókn til mín og skelltum við okkur á þorrablótið á Borgarfirði. Þetta var í fyrsta skipti sem að ég fer þar á blótið og ég var sko ekki svikinn. Í apríl byrjun komu síðan mamma og pabbi í heimsókn til mín til þess að gleðjast með mér (eða samhryggjast) á fertugsafmælinu mínu fimmta dag þess mánaðar. Kvöldið fyrir afmælið mitt fór ég með félögum mínum í RT-9 að Skjöldólfsstöðum þar sem þeir héldu sína árlegu vorgleði. Ég átti von á því að Smári félagi minn kæmi þangað því að hann ætlaði sér að mæta í afmælið mitt. En þegar hann birtist kom í ljós að tveir laumufarþegar höfðu slegist í för með honum, þeir Flóvent og Siggi og komu þeir mér þannig skemmtilega á óvart. Varð heimsókn þeirra hin besta. Í maíbyrjun flaug ég til London þar sem ég stoppaði í þrjá daga áður en ég fór til Skotlands þar sem ég átti langa helgi með félögum mínum í RT-11 víðsvegar úr Evrópu. Ég fór síðan heim til Eyja fyrstu helgina í júlí þar sem að pabbi hélt upp á 65 ára afmælið sitt um goslokahelgina. Ég hafði með mér góða ferðafélaga þau Þröst frænda minn og Hoffu sambýliskonu hans. Frábær helgi. Ættarmót var síðan haldið á Bogganum og komu Hjalli og Þórína þangað og skemmtum við okkur hið besta í góðra vina (og ættingja) hópi. Ég fór síðan að sjálfsögðu á Þjóðhátíðina. Síðla sumars skrapp ég síðan aftur á suðurlandið til þess að samgleðjast með henni Elínu frænku minni þegar að hún giftist honum Bjössa sínum. Í októberbyrjun lagði ég síðan aftur land undir fót en þá flutti ég búferlum til Reykjavíkur og hóf störf hjá Landspítalanum. Ég var síðan að vinna um jólin að vanda og kom heim til Eyja 28. des. til þess að vera hjá fjölskyldunni yfir áramótin.

Þetta var árið 2008 í nokkuð stuttu máli.

Ég vona að landsmenn allir svo og vinir mínir og ættingjar um heim allan eigi gleðilegt og friðsælt ár 2009.

Kominn heim.

Já, ég kom á eyjuna fögru með skemmtiferðaskipi vegagerðarinnar um þrjúleitið í dag. Byrjaði á því að stoppa í kaffi hjá syss og skaust svo heim til mömmu og pabba. Að því loknu leit ég við í skátaheimilinu en þar var verið að opna flugeldasöluna. Ég fékk síðan þennan ljómandi góða saltfisk hjá þeim gömlu þannig að það spillti ekki fyrir þeirri gleði að vera kominn heim.
En á morgun hefst alvara lífsins. Ég ætla að sjálfsögðu að mæta í flugeldasöluna e-h tíman eftir hádegið og mun verða þar meira eða minna fram yfir lokun á gamlársdag. Þessi stærsta fjáröflun okkar er að sjálfsögðu nokkuð tímafrek og útheimtir allnokkra vinnu en hún er einnig ansi skemmtileg svo ekki sé minnst á að hún er okkur lífsnauðsynleg.
En hvað um það, ég er semsagt kominn á paradísareyjuna og verð hér fram á laugardagsmorgun.

Kv. Aðalsteinn

Jólakveðja.

Það er með ólíkindum hvað tíminn hefur flogið áfram. Þjóðhátíðin er varla nema rétt nýliðin og nú eru að skella á okkur jól.

Þessi jólin verða með mjög svipuðu sniði og flest jól hafa verið hjá mér síðan 1997, þ.e. ég verð í vinnu á aðfangadagskvöld. Vissulega er söknuður að vera fjarri mínum nánustu á þessum tíma en hinsvegar hefur mér alltaf fundist hátíðlegt að vera með öðrum sem að ekki geta dvalið hjá sínum nánustu.
Ég mun síðan halda á braut frá borg óttans og sigla heim í sæluna þann 28. des. og verja áramótunum með mínum nánustu.

Kæri lesandi góður, ég óska þér og þínum gleðilegra jóla og ég vona að þú hafir það sem allra best um hátíðarnar.

Með jólakveðju, Aðalsteinn.

Af hverju???

Af hverju þarf lögreglan að bjóða e-h skríl inn til sín til viðræðna? Lögreglan á að fá vinnufrið en ekki að þurfa að standa í þessum skrípaleik. Er þá ekki kominn tími til að allir þeir sem keyrt hafa drukknir flykkist niður að stöð og heimti að fá lausan hvern þann sem tekinn er fyrir að keyra drukkinn. Af hverju mætir ekki skríllinn til þess að mótmæla þegar að innbrotsþjófur er tekinn og honum stungið inn? Látið lögguna í friði, þetta eru einstaklingar sem eru að vinna sína vinnu.
Ef þið getið ekki sætt ykkur við afleiðingarnar þá skuluð þið hætt þessum skrílslátum.

Lögregla ræddi við mótmælendur

Réttmæt hneykslun?

Margir fara nú mikinn og segja lögregluna ganga of langt með því að úða á þá sem voru búnir að brjóta sér leið inn á lögreglustöðina. Móðir skammast yfir því að 16 ára dóttir hennar fékk yfir sig piparúða þegar hún barst með straumnum inn í anddyrið, en hví var hún með barnið sitt í fremstu víglínu mótmælenda? Hélt fólkið virkilega að það kæmist upp með að brjóta rúður og ryðja sér leið inn í lögreglustöðina án þess að nokkuð yrði gert?
Að mínu mati gerði lögreglan ekkert af sér í þessu máli (hvort að atvinnumótmælandinn var handtekinn löglega eða ólöglega segi ég ekkert til um), þeir voru einfaldlega að verja sig. Múgur sem er orðinn svo æstur að hann brýtur sér leið inn í lokaða byggingu er alveg eins líklegur til að ganga lengra og þá er stutt í líkamsmeiðingar.
Hættið því þessu væli. Ef þið ráðist á lögregluna (eða hvern sem er í raun og veru) verðið þið að geta tekið afleiðingunum.

Hábölvað.

Þetta er með verri fréttum sem ég hef fengið lengi. Það að geta keyrt á Bakka og skotist heim hefur verið mjög þægilegur kostur, sem nú er því miður ekki lengur í boði.

Ég vill hafa þann möguleika að geta valið um það hvort ég vill fljúga frá Reykjavík eða Bakka. Persónulega hef ég valið Bakka því að það er mun ódýrari kostur plús það að maður hefur meira val um hvenær maður vill fljúga.

Ríkisstyrkt flug er hið besta mál en það þarf þá að gera báðum aðilum jafn hátt undir höfði.
Ég skora því á þingmenn okkar að knýja fram leiðréttingu á þessu og hvet alla sem vilja áframhaldandi Bakkaflug til að gera slíkt hið sama.

Fljúga ekki á Bakka í vetur